La liga: Real Madrid yatsinzwe na Mallorca iha umwanya wa mbere FC Barcelona

Ikipe ya FC Barcelona yafashe umwanya wa mbere muri shampiyona ya Espagne, nyuma yuko Real Madrid bari bahanganye yatsinzwe na Mallorca, mu mukino w’umunsi wa cyenda wa shampiyona ya Espagne.

Real Madrid yari imaranye uyu mwanya igihe kinini, yari yasuye Mallorca ku kibuga cyayo Estadi de Son Moix, ihatsindirwa igitego 1-0. Ni igitego cyabonetse ku munota wa karindwi w’umukino gitsinzwe na Lago Junior.

Zinedine Zidane barwanye no kwishyura iki gitego mu minota isaga 80 yari isigaye, gusa birangira bibananiye burundu. Umupira bawihariye mu buryo bugaragara, amashoti batera menshi mu izamu, gusa kubona igitego byibura cyo kunganya birananirana.

Ugutsindwa kwa Real Madrid kwahuriranye n’uko mukeba wayo FC Barcelona yari yitwaye neza ku gicamunsi cy’ejo ku wa gatandatu atsinda Eibar ibitego 3-0, birangira afashe umwanya wa mbere muri shampiyona n’amanota 19.

Ibitego bya FC Barcelona byatsinzwe na Antoine Griezmann, Luis Suarez na Lionel Messi.

Magingo aya Real Madrid iri ku mwanya wa kabiri ku rutonde rwa shampiyona n’amanota 18, ikaba irushwa inota rimwe na mukeba.

Atletico Madrid yo nyuma yo kunganya na Valencia igitego 1-1 ku munsi w’ejo, yahise ifata umwanya wa kane n’amanota 16.

Ku munsi w’ejo ku wa mbere ni bwo komite ishinzwe amarushanwa mu ishyirahamwe ry’umupira w’amaguru muri Espagne igomba kugena itariki FC Barcelona na Real Madrid zizakiniraho. Ni nyuma y’uko umukino wagombaga guhuza aya makipe yombi ku wa gatandatu w’icyumweru gitaha wasubitswe, kubera imyigaragambyo ikomeje kubera mu ntara yaCatalunya.

Amakipe yombi yemerenyije ko agomba guhura ku wa 18 Ukuboza, gusa Federasiyo ntabwo irabiha umugisha.

Comments

comments