Kiyovu Sports yamennye inshishi mu birori bya Rayon Sports Day
Ikipe ya Kiyovu Sports yatsinze Rayon Sports ibitego 2-1, mu mukino wasoje ibirori by’umunsi mukuru wa ’Rayon Sports Day’ wahariwe iriya kipe.
Ni ibirori byabereye kuri Stade Amahoro i Remera, byitabirwa n’abafana babarirwa mu bihumbi umunani.
Abahanzi barimo Eric Senderi International Heat bari mu basusurukije abakunzi ba Rayon Sports, mbere yo kwerekwa abakinnyi 29 ikipe yabo izifashisha muri shampiyona y’icyiciro cya mbere igomba gutangira tariki ya 30 z’uku kwezi.
Ibirori by’umunsi mukuru wa Rayon Day byasojwe n’umukino wa gicuti iyi kipe yatsinzwemo na mukeba wayo Kiyovu Sports ibitego 2-1.
Umurundi Bigirimana Abedi na rutahizamu Mugenzi Bienvenu ni bo banyeganyeje inshundura ku ruhande rwa Kiyovu Sports, mu gihe umunya-Caméroun Essombe Willy Onana ari we watsinze impozamarira ku ruhande rwa Rayon Sports.
Rayon Sports izatangira shampiyona yakira kuri Stade ya Kigali i Nyamirambo Mukura Victory Sports ku wa 30 Ukwakira, mu gihe kuri uwo munsi Kiyovu Sports na yo izakirira Gorilla FC kuri Stade ya Kigali.
