AmakuruImikino

Kagere na Haruna bafashije Simba SC kwandika amateka mashya muri shampiyona ya Tanzania

Abasore babiri b’Abanyarwanda, Meddie Kagere na Haruna Niyonzima baraye bafashije Simba kwitwara neza mu mukino wa shampiyona ya Tanzania, banafasha iyi kipe gutsinda imikino 10 ya shampiyona yikurikiranya bwa mbere mu mateka yayo.

Ikipe ya Simba SC yari yasuye Mbao FC, mu mukino wabereye kuri Stade ya Morogoro.

Muri uyu mukino, Meddie Kagere na Haruna Niyonzima wakundaga kwinjira mu kibuga asimbura bari bagiriwe ikizere cyo kubanza mu kibuga n’umutoza Patrick Aussems.

Simba SC yafunguye amazamu ku munota wa 25 ibifashijwemo na Kapiteni wayo Jonh Rafael Bocco, nyuma y’umupira wari uturutse kuri Coup Franc. Uyu musore usanzwe akinira ikipe y’igihugu ya Tanzania yatsindiye Simba SC igitego cya kabiri kuri Penaliti, nyuma y’ikosa yari akoreweho ku munota wa 56 w’umukino.

Kabuhariwe Meddie Kagere utajya yiburira, yatsindiye Simba SC igitego cya gatatu ku munota wa 79 w’umukino, nyuma yo kugushwa mu rubuga rw’amahina. Uyu musore uzwi nka MK14 yinjije neza Penaliti yahawe, ashimangira insinzi ya Simba y’ibitego 3-0.

Gutsinda uyu mukino byafashije Simba SC kugumana umwanya wa 3 muri shampiyona n’amanota 57, amanota 10 inyuma ya Young Africans iyoboye shampiyona. Cyakora cyo iyi Simba iracyafite imikino itandatu y’ibirarane itakinnye kuko yari ihagarariye Tanzania muri CAF Champions league.

Kapiteni wa Simba John Bocco ahanganye n’abakinnyi ba Mbao FC.
Patrick Aussems utoza Simba aha abasore be amabwiriza.
Twitter
WhatsApp
FbMessenger