Kagere, Kayumba na Rwatubyaye mu Banyarwanda bakina hanze batsinze ibitego muri Weekend

Impera z’icyumweru gishize zaranzwe no kwitwara neza kuri bamwe mu Banyarwanda bakina mu makipe yo hanze y’igihugu, cyakora cyo bamwe ntibabasha kugisoza neza kuko amakipe yabo yagiye atsindwa.

Abakinnyi bitwaye neza batsinda ibitego barimo Meddie Kagere ukinira Simba SC yo muri Tanzania, mugenzi we Sibomana Patrick Papy ukinira Young Africans, Rwatubyaye Abdoul ukinira Colorado Springs Switchbacks FC yo muri leta zunze ubumwe za Amerika, na Kayumba Soter ukinira AFC Leopards yo mu gihugu cya Kenya.

Uko icyumweru gishize cyagenze ku Banyarwanda bakina hanze y’igihugu.

Meddie Kagere (Simba SC – Tanzania)

Uyu musore usanzwe ari rutahizamu ngenderwaho mu kipe y’igihugu Amavubi, ni umwe mu bakomeje kwandika amateka muri shampiyona ya Tanzania. Ku wa gatatu w’icyumweru gishize yafashije ikipe ye kunyagira Kagera Sugar ibitego 3-0 (birimo bibiri bye),  mu gihe ku munsi w’ejo ku Cyumweru batsinze Biashara United ibitego 2-0 na bwo harimo kimwe cye.

Kayumba Soter (AFC Leopards_Kenya)

Kayumba Soter na AFC Leopards abereye kapiteni bakinaga na Chemilil Sugar FC mu mukino w’umuni wa kane wa shampiyona ya Kenya,  bikarangira bayinyagiye ibitego 4-1. Kayumba Soter yatinzemo icya mbere, ikindi gitsindwa na Ndikumana Tresor wahoze akinira Amagaju, mu gihe ibindi bibiri byatinzwe na John Makwata.

Jacques Tuysenge (Petro Atletico- Angola)

Uyu musore usanzwe ari kapiteni w’ikipe y’igihugu Amavubi, kuri ubu akinira Petro Atletico de Luanda yo muri Angola. Tuyisenge ari kumwe n’ikipe ye, bakatishije itike yo gukina amatinda ya CAF Champions league nyuma yo kunganyiriza i Kampala na KCCA igitego 1-1. Cyakora cyo uyu musore ukomoka i Rubavu ntabwo yigeze agaragara mu bakinnyi bifashishijwe kuri uyu mukino.

Sibomana Patrick Papy (Young Africans – Tanzania)

Uyu musore n’ikipe ye ntibahiriwe n’impera z’icyumweru, kuko ku wa Gatandatu basezerewe na Zesco United yo muri Zambia muri CAF Champions League ku giteranyo cy’ibitego 3-2, umukino ubanza wari 1-1, uwo kwishyura batsindwa ibitego 2-1. Impozamarira ku ruhande rwa Young Africans yatsinzwe na Papy.

Muhajiri Hakizimana (Emirates FC – UAE)

Ku wa Gatandatu w’icyumweru gishize, Muhadjiri na Emarates Club bakinaga umukino w’igikombe cy’igihugu na Masafi, baje bayitsinda ibitego 3-1. Uyu  n]mukino Muhadjiri yawukinnye ndetse yanabanje mu kibuga.

Djihad Bizimana (Waasland Beveren – Belgium)

Uyu musore ngenderwaho mu kipe y’igihugu Amavubi n’ikipe ye ntabwo bahagaze neza muri iyi minsi. Ku munsi w’ejo bakinaga na Anderlecht, banganya 0-0, mu umukino Djihad atakinnye bitewe n’ikibazo cy’imvune amaranye iminsi.

Nirisarike Salomon (Pyunik FC – Armenia)

Nyuma y’uko ku itariki 30 Nzeri 2019 batsinze Lori ibitego 3-1, akaba ari nawo wari umukino wa mbere wa Nirisarike muri iyi kipe, ndetse akanatsinda igitego, uyu munsi ku wa Mbere barakina na Ararat-Armenia. Muri shampiyona bari ku mwanya wa 6 n’amanota 12 ku rutonde ruyobowe na Ararat n’amanota 19.

Muhire Kevin (Misr lel Makkasa – Egypt)

Iyi kipe iheruka gukina tariki ya 22 Nzeri na Aswan mu mukino ufungura shampiyona aho banatsinze ibitego 3-2, ni umukino Kevin atakinnye.

Bazongera gukina tariki ya 3 Ukwakira 2019 bakina na Zamalek.

Rwatubyaye Abdul (Colorado Springs Switchbacks FC – USA)

Ku munsi w’ejo bakinanaga Las Vegas Lights  mu mukino warangiye batsinzwe ibitego 3-1. Impozamarira ku ruhande rwa Colorado yatsinzwe na Rwatubyaye Abdul ku manota wa 92. Ikipe ya Rwatubyaye ikaba iri ku mwanya ubanziriza uwa nyuma n’amanota 23 ku rutonde ruyobowe na Phoenix Rising n’amanota 72.

Yannick Mukunzi (Sandvikens IF – Sweden)

Yannick Mukunzi na Sandvikens mu cyiciro cya 2 muri Sweden, ntabwo bahiriwe n’impera z’icyumweru kuko batsinzwe na Sollentuna ibitego 3-1, mumukino Yannick Mukunzi yakinnye. Iyi kipe ikaba iri ku mwanya wa 4 n’amanota 42 ku rutonde ruyobowe na
Akropolis n’amanota 57.

Emery Bayisenge (Saif Sporting – Bangladesh)

Aba basoje ku mwanya wa 4 muri shampiyona y’umwaka ushize, ubu bari mu myiteguro ya shampiyona umwaka w’imikino wa 2019-2020 izatangira tariki ya 6 Ukuboza 2019.

Usengimana Fuastin, Biramahire Abbedy na Bashunga Abouba (Buildcon – Zambia)

Ku munsi w’ejo abasore batatu b’abanyarwanda bakinira ikipe ya Buldcon FC muri Zambia, bari bamanutse mu kibuga bakina na Kabwe Warriors, bari basuye Kabwe Warriors baje kuyitsinda igitego 1-0.

Mugiraneza Jean Baptiste Migi (KMC- Tanania)

Mugiraneza Jean Baptitse Migi ukinira ikipe ya KMC yo muri Tanzania, ku munsi w’ejo bari bakiriye ikipe ya Ndanda muri shampiyona ya Tanzania.

Amakipe yombi yanganyije 1-1, ni umukino Migi atakinnye bitewe n’uko atarabona ibyangombwa, akaba azatangira gukinira iyi kipe mu Kwakira 2019.