Jose Mourinho yise Paul Pogba “Virus”iri muri Manchester United
Umutoza wa Manchester United Jose Mourinho yeruye imbere y’imbaga y’abakunzi b’Ikipe ya Manchester United ko Paul Pogba ari kimwe n’agakoko (Virus) kamunga abandi bakinnyi b’iyi kipe kagahindura imyumvire yabo.
Ibi Mourinho yabikomojeho nyuma y’uko umubano we n’uyu mukinnyi utari usanzwe uhagaze neza, bikaba byagaragaje ko kutumvikana hagati yabo kumaze gufata indi ntera.
Ikinyamakuru “Dail Mail” cyatangaje ko nyuma y’umukino wabaye kuwa gatandatu ugahuza ikipe ya Southampton na Manchester United bakanganya ibitego 2-2 Mourinho yibasiye Pogba ku buryo bukomeye akamusebereza imbere ya bagenzi be.
Mourinho yavuze ko hakurikijwe ubwitange abandi bakinnyi ba Manchester United bagaragazaga mu kibuga muri uyu mukino n’uburyo Paul Pogba yabatenguhaga agatakaza imipira mu buryo yishakiye ndetse burimo n’agahimano, ariwe wabaye intandaro yo gutuma ikipe ye ititwara neza muri uyu mukino.
Mourinho yashinje Pogba gutsindisha ikipe ya Manchester United ndetse amwita agakoko kamunga abandi bakinnyi kakababuza gukina.
Mourinho yakomeje abwira Pogba ati ” Ntukina, Ntiwubaha abafana n’abakinnyi bagenzi bawe, Uragerageza guhindura gusa ibitekerezo by’abantu beza bagukikije.”
Nyuma y’umukino wa Manchester United na Southampton, Mourinho yari yatangarije itangazamakuru ko ashima uburyo abakinnyi babiri bo hagati barimo Matic na Scott McTominay bitwaye, Gusa akavuga ko bavangiwe na Pogba watakazaga imipira myinshi.
Manchester United ikimara kunganya na Southampton byahise biyihesha umwanya wa7 ku rutonde rwa gateganyo rwa Shampiyona n’amanota 28 mu gihe Manchester City iri ku mwanya wa Mbere iyirusha amanota 16 yose, aho ifite 38 ndetse kugeza ubu ntiratakaza umukino n’umwe.
