Itariki FC Barcelona izongera gucakiraniraho na Real Madrid yamenyekanye
Perezida w’ishyirahamwe ry’umupira w’amaguru muri Espagne Javier Tebas, yemeje ko El Clásico ya mbere ya 2019 hagati ya Real Madrid na FC Barcelona izaba ku wa 02 Werurwe uyu mwaka.
Aya makipe yombi azaba yahuriye mu mukino wo kwishyura wa shampiyona ya Espagne. Real Madrid ni yo izaba yakiriye FC Barcelona kuri Stade yayo ya Santiago Bernabéu.
Uyu mukino utegerejwe n’amamiliyoni y’abatuye isi uzatangira ku isaha ya saa mbili na 45 z’umugoroba.
Ni nyuma y’umukino ubanza amakipe yombi yari yahuriyemo mu Ukwakira k’umwaka ushize, ukarangira FC Barcelona inyagiye Real Madrid ibitego 5-1. Uyu ni wo mukino wa mbere utaragaragayemo Lionel Messi na Cristiano Ronaldo kuva muri 2009. Ibitego bitatu bya Luis Suarez, icya Philippe Coutinho n’icya Artulo Vidal ni byo byahesheje FC Barcelona amanota atatu imbere y’umwanzi wayo w’ibihe byose.
Ikipe ya FC Barcelona izaba yagiye gukinira ku kibuga cya Santiago Bernabéu cyakunze kuyihira mu myaka nk’itatu cyangwa ine ishize. Imwe mu mikino iyi kipe yagiye ikinira kuri iki kibuga ikahacana umucyo, harimo uwo mu mwaka w’imikino wa 2015/16 yahatsindiye Real Madrid ibitego 4-0.
Mu mwaka w’imikino wa 2016/17 na bwo iyi kipe yahahuriye na Real Madrid muri shampiyona na bwo ihakura amanota atatu. Ni nyuma yo kuhatsindira ibitego 3-2. Igitego kitazibagirana muri uyu mukino ni icyo Lionel Messi yatsinze ku munota wa nyuma w’umukino.
Umukino FC Barcelona iheruka gukinira i Santiago Bernabéu na wo yawitwayemo neza. Ni umukino wabaye ku wa 23 Ukuboza 2017 urangira FC Barcelona itsinze Real Madrid ibitego 3-0.
