Intambara muri shampiyona y’Abongereza irakomeje hagati ya Liverpool na Manchester City
Intambara y’ugomba gutwara igikombe cya shampiyona y’Abongereza hagati ya Manchester City na Liverpool ikomeje gufata indi ntera, dore ko amakipe yombi yongeye kwitwara mu mikino y’umunsi wa kane wa shampiyona.
Aya makipe yombi yari ahataniye igikombe kugeza ku munsi wa nyuma, yagarutse muri shampiyona y’uyu mwaka intego ari ukongera kurwana kugeza ku munota wa nyuma.
Manchester City yari yakiriye Brithon & Hove Albion ku kibuga cyayo El Etihad, iza kwitwara neza kuko yayinyagiye ibitego 4-0.
Ibitego bya Kevin De Bruyne, bibiri bya Sergio Aguero n’icya Bernardo Silva byari bihagije kugira ngo Manchester City yegukane amanota atatu yatumye yuzuza amanota 10 mu mikino ine ya shampiyona imaze gukina.
Ikipe ya Liverpool yo yari yasuye Burnley, na yo yitwara neza kuko yatsinze ibitego 3-0. Ibitego bya Liverpool byatsinzwe na Sadio Mane cyo kimwe na Roberto Firmino, mu gihe icya mbere cyitsinzwe na myugariro Chris Wood.
Gutsinda Burnley byafashije Liverpool gukomeza kuyobora shampiyona y’Abongereza n’amanota 12, mu gihe Manchester City iyigwa mu ntege n’amanota 10.
Mu yindi mikino yabaye kuri uyu wa gatandatu, Manchester United yaguye na Southampton igitego 1-1, Chelsea na Sheffield United banganya 2-2, Crystal Palace itsinda Aston Villa igitego 1-0, Leicester City itsinda AFC Bournemouth ibitego 3-1, Newcastle United igwa miswi na Wattford 1-1 mu gihe West Ham United yatsinze Norwich City ibitego 2-0.
