Ingabo za Ethiopia zishe abasirikare bakomeye ba TPLF 12, abandi benshi bafatwa mpiri
Guverinoma ya yatangaje ko ingabo zayo zishe abasirikare bakuru b’umutwe wa TPLF 12 abandi benshi bafatwa mpiri, na ho abatari bake bahitamo kuyamanika.
Guverinoma ya Ethiopia yemeje aya makuru mu butumwa bwanyujijwe kuri Twitter y’Ibiro bya Minisitiri w’Intebe wa kiriya gihugu ku wa Kabiri tariki ya 07 Ukuboza.
Ethiopia ivuga ko bariya basirikare ba TPLF biciwe mu mirwano ingabo zayo zari zihanganiyemo n’uriya mutwe wegamiye ku ishyaka riyoboye intara ya Tigray.
Iti: “Muramenyeshwa ko mu cyumweru gishize, abasirikare bakuru bagera kuri 12 ba TPLF bishwe.”
Guverinoma ya kiriya gihugu yakomeje isobanura ko intambwe ingabo za Leta zateye yo kwigarurira imijyi ya Dessie na Kombolcha ikomeye cyane ari igihombo gikomeye kuri TPLF yakwiye imishwaro.
Yavuze ko usibye abasirikare ba TPLF bishwe, hari abandi bafashwe mpiri, abandi bakaba bari kwitaba ijwi rya Minisitiri w’Intebe, Abiy Ahmed ribasaba kurambika intwaro.
It is to be noted that a week ago up to 12 of TPLF's senior ranking military personnel were taken out. Yesterday’s feat is a strong blow to the terrorist group that is in disarray. Great numbers of TPLF fighters are being apprehended with many also heeding the call to surrender.
— Office of the Prime Minister – Ethiopia (@PMEthiopia) December 7, 2021
Ethiopia yatangaje ibyo yagezeho mu gihe Umuvugizi wa TPLF, Getachew Reda, aheruka gutangaza ko kuba abarwanyi babo bakuwe mu duce twa Dessie na Kombolcha atari uko batsinzwe, ko ahubwo ngo byari mu mugambi wabo kuko batari bahashyize abo kuhabohora.
