AmakuruImikino

Haruna Niyonzima umeze neza muri iyi minsi yafashije Simba SC gutsinda Alliance FC

Umunyarwanda Haruna Niyonzima ukomeje kwitwara neza mu kipe ya Simba SC yo mu gihugu cya Tanzania, yongeye kugoboka iyi kipe akinira ayifasha gukura amanota atatu ku kipe ya Alliance FC.

Amakipe yombi yari yahuriye mu mukino wa shampiyona ya Tanzania umaze kurangira mu kanya kashize. Ni umukino warangiye Simba SC itsinze ibitego 2-0 bwa Alliance FC harimo n’icya Haruna.

Muri uyu mukino, Haruna Niyonzima yafunguye amazamu ku munota wa 21 w’umukino. Ni ku mupira mwiza yari ahinduriwe na Yassin Mzamiru, abanza kuwufungisha igituza mbere yo kurekurira umuzinga w’ishoti mu rucundura.

Simba SC yabonye igitego cya kabiri ku munota wa 75 w’umukino ibifashijwemo n’Umugande Emmanuel Okwi.

Muri uyu mukino, rutahizamu Meddie Kagere abafana ba Simba bahimbye akazina ka “MK14” yakinnye iminota itanu yonyine kuko yari yabanje ku ntebe y’abasimbura. Kagere waherukaga gutsinda ibitego 2 mu mukino Simba yatsinzemo Coastal Union ibitego 2-0, yinjiye mu kibuga ku munota wa 85 asimbuye Kapiteni we John Bocco.

Kwitwara neza kwa Haruna Niyonzima gushingiye ku kizere yagiriwe n’umutoza we Patrick Aussems. Mu busanzwe mbere y’uko Haruna afasha Simba gusezerera AS Vita Club mu mikino ya CAF Champions league yakoreshwaga nk’umusimbura. Gusa kuva yakwitwara neza muri uriya mukino, yatangiye kugirirwa ikizere cyo kubanza mu kibuga kugeza magingo aya.

Amanota atatu Simba SC yakuye kuri Alliance FC yayifashije gukomeza kotsa igitutu amakipe ya Azam FC na Young Africans ayiri imbere. Magingo aya Simba ifite amanota 63 mu mikino 25 ya shampiyona imaze gukina, ikaba irushwa amanota atatu yonyine na Azam imaze gukina imikino 32. Simba SC kandi irarushwa amanota 11 na Young Africans imaze gukina imikino 32 ya shampiyona.

Mu gihe Simba yaba ishoboye gutsinda imikino irindwi y’ibirarane ifite, yahita igira amanota 84 igasigara irusha Young Africans bahora bahanganye amanota 10 yose.

Twitter
WhatsApp
FbMessenger