AmakuruInkuru z'amahanga

France : Hakozwe imyigaragambyo ikarishye yamagana ikumirwa ry’abatarikingije COVID-19

Mu Bufaransa hakozwe imyigaragambyo ikomeye cyane ndetse bamwe mubayikoze batangaza ko biteguye guhangana na Perezida w’iki gihugu, Emmanuel Macron wavuze ko “ashaka gushyiraho amabwiriza akakaye ku bantu batarafata urukingo” ku buryo bazava ku izima bakemera kwikingiza.

Abantu barenga 100,000 nibo babaruwa ko bakoze imyigaragambyo mu Bufaransa bamagana gahunda ya leta yo kubangamira abantu batakingiwe COVID-19.

Minisiteri y’Umutekano yatangaje ko ku wa Gatandatu abantu 105,200 aribo bitabiriye imyigaragambyo, harimo abantu 18,000 mu murwa mukuru Paris.

Iyi myigaragambyo yaje no kubamo ubugizi bwa nabi bwasize abantu 10 batawe muri yombi, abapolisi bamwe baranakomereka.

Ibi nibintu bikomeje gushyira igitutu ku nzego z’ubuzima, kuko  abigaragambya biganjemo abatambaye n’udupfukamunwa bavuga ko bakeneye kubwizwa ukuri kuri iki cyorezo, ndetse ko badakeneye amabwiriza akumira abantu batikingije mu gihe ubwandu bukomeje kwiyongera.

Iyo myigaragambyo yamagana itegeko rikomeje kunozwa, rizaba ritegeka abantu kubanza kugaragaza ko bakingiwe COVID-19 mu buryo bwuzuye mbere yo kwemererwa kujya kurira muri za resitora, kujya mu ngendo zihuza imijyi cyangwa kwitabira ibikorwa ndangamuco.

Ku wa Kane uwo mushinga w’itegeko watowe n’umutwe w’abadepite. Biteganywa ko rizatangira kibahirizwa ku wa 15 Mutarama 2022, nubwo umutwe wa Sena ushobora gutinza iyo tariki nuba utararitora nk’itegeko.

Iri tegeko ryarakaje abatemera inkingo muri iki gihugu ndetse uburakari bwabo butizwa umurindi n’amagambo Perezida Macron yavuze mu mpera z’iki cyumweru.

Perezida Macron yavuze ko ashaka gutuma abadakingiye COVID-19 bo mu Bufaransa bagorwa n’ubuzima. Yabwiye ikinyamakuru Le Parisien ati “Rwose ndashaka kubabangamira, kandi tuzakomeza gukora ibi kugeza ku mpera”.

Ubwandu bushya bwa COVID-19 mu Bufaransa bukomeje kuzamuka cyane, ku buryo ku wa Gatandatu habonetse abanduye 303,669.

Twitter
WhatsApp
FbMessenger