Fireman uvuye i Wawa agiye kugaragara mu gitaramo gikomeye
Umuhanzi Fireman wamamaye mu njyana ya Hip- Hop, nyuma y’amasaha amake ageze mu mujyi wa Kigali avuye i Wawa, yamenyeshejwe ko azaririmba mu gitaramo gisoza ukwezi gitegurwa n’Umujyi wa Kigali.
Uyu muhanzi yari amaze umwaka wose agororerwa mu kigo ngororamuco cy’Iwawa, umuhanzi Fireman ku munsi w’ejo ni bwo yageze muri Kigali, akaba yari yatwaweyo ashinjwa gukoresha ibiyobyabwenge.
Umujyi wa Kigali utegura ibitaramo bisoza ukwezi, wamaze kwemeza ko Fireman azaririmba mu gitaramo gisoza ukwezi kwa Nzeri kizabera i Gikondo ahasanzwe habera Expo, ni tariki ya 27 Nzeri 2019.
Fireman akaba agiye kuririmbira abakunzi be nyuma y’igihe kinini batamubona, akaba azafatanya na Dream Boys, Orchestre Impala, Itorero Indatirwabahizi, Paccy Nyirantwali na Queen Cha.
