FC Barcelona yasubiye gukomangira Chelsea iyisaba rutahizamu wayo
Ikipe ya FC Barcelona yifuje kenshi Willian ukinira ikipe ya Chelsea, yongeye gusubira muri iyi kipe yo mu Bwongereza isaba ko yagurishwa uyu musore ukomoka mu gihugu cya Brazil.
Iyi kipe yo muri Espagne yifuje cyane uyu musore mu mpeshyi y’umwaka ushize ndetse inemeranya na we ibintu byinshi, gusa ibyo kuba yayerekezamo byaje gupfa ku munota wa nyuma.
Barcelona iyi yakomanze ku muryango wa Chelsea incuro eshatu isaba ko yahabwa uyu musore, gusa Chelsea itera utwatsi amafaranga yose iyi kipe yagerageje kuyiha. Amafaranga ya nyuma ikipe ya Chelsea yanze yari miliyoni 55 z’ama Pounds Barcelona yashakaga gutanga muri Nyakanga.
Amakuru ariho avuga ko ikipe ya FC Barcelona yifuza guha Chelsea Umunya-Brazil Malcom yakuye muri Bordeaux mu mpeshyi, kugira ngo ihabwe Willian. Malcom w’imyaka 21 y’amavuko yageze muri FC Barcelona mu mpeshyi ya 2018 aguzwe miliyoni 38 z’ama Pounds, gusa agorwa no kutabona umwanya muri iyi kipe kubera amazina akomeye ayirimo.
Willian da Silva w’imyaka 30 y’amavuko Barcelona ikomeje kwirukankaho, afitanye amasezerano na Chelsea agomba kurangira mu mwaka utaha.
