FC Barcelona na Atletico Madrid zahanwe nyuma y’umukino wabahuje kuri uyu wa Gatandatu
Amakipe ya FC Barcelona na Atletico Madrid yahawe ibihano kubera imyitwarire mibi yagaragaye mu mukino wahuje aya makipe yombi mu mpera z’iki Cyumweru.
Kuri uyu wa Gatandatu tariki ya 24 Ugushyingo 2018, kuri Stade Wanda Metropolitano, Atletical Madrid yakiriye FC Barcelona ku mukino w’umunsi wa 12 wa shampiyona ya Esipanye(Espagne) ‘La Liga’ amakipe yombi anganya 1-1.
Atletical Madrid ni yo yafunguye amazamu ku gitego cya Diego Costa mu gihe FC Barcelona yishyuriwe n’umufaransa Ousmane Dembélé wagiyemo asimbuye.
Aya makipe yombi yaciwe amayelo €3,000 kugeza ku €6,000 , ishyirahamwe ry’umupira w’amaguru muri Esipanye rivuga ko aya makipe yaciye aya mafaranga kubera imyitwarire yaranze abafana bo kumpande zombi nyuma yaho Dembele atsinze igitego cyo kwishyura.
Abafana ba Atletico bateye amacupa mu kibuga n’aba FC Barcelona barwana bashaka kwinjira mu kibuga nyuma yaho Dembele atsinze igitego cyo kwishyura mu minota ya nyuma y’umukino. Umukino waringiye amakipe yombi anganya igitego kimwe kuri Kimwe.
Kugeza ubu FC Barcelona ni yyo iyoboye urutonde rw’agateganyo rwa La Liga n’amanota 25 ikurikiwe na Atletico Madrid n’amanota 24 , Sevilla na Alaves zikurikira aya makipe zinganya amanota 23.
