Espagne itsinze Australia igera ku mukino wa nyuma w’igikombe cy’isi cya Basketball

Ikipe y’iguhugu ya Espagne itsinze iya Australia bigoranye, igera ku mukino wa nyuma w’igikombe cy’isi cya Basketball gikomeje kubera mu gihugu cy’Ubushinwa.

Uyu mukino wari ukomeye cyane ku mpande zombi urangiye Espagne iwutsinze ku manota 95 kuri 88 ya Australia.

Espagne iri mu makipe ahabwa amahirwe yo kwegukana iki gikombe, yageze ku mukino wa nyuma ibifashijwemo n’abakinnyi nka Victor Claver usanzwe akinira FC Barcelona, Rudy Fernandes ukinira Real Madrid na Kapiteni Marc Gazol usanzwe ari umukinnyi ukomeye wa Toronto Raptors yo muri Leta zunze ubumwe za Amerika.

Agace ka mbere k’umukino karangiye Espagne iri imbere n’amanota 22 kuri 21 ya Australia, mbere y’uko Australia izana imbaraga zidasanzwe mu gace ka kabiri bikarangira ikegukanye ku manota 16 ku 10 y’Abanya-Espagne.

Amakipe yombi yagiye kuruhuka Australia iri imbere n’amanota 37 kuri 32 ya Espagne.

Espagne yasabwaga gukoresha imbaraga zidasanzwe mu gace ka gatatu n’aka nyuma, kugira ngo ikuremo ikinyuranyo cy’amanota atanu yarushwaga. Agace ka gatatu yakegukanye ku manota 19 kuri 18 ya Australia, inisubiza aka kane ku manota 20 kuri 16.

Kuko iminota isanzwe y’umukino yarangiye amakipe yombi anganya amanota 71 kuri 71, byabaye ngombwa ko hashyirwaho utundi duce tubiri twa kamarampaka kugira ngo haboneke ikipe itsinda.

Agace ka mbere karangiye amakipe yombi anganya amanota icyenda, aka kabiri Espagne igatwara ku manota 15 ku manota umunani ya Australia, yegukana insinzi gutyo.

Ikipe y’igihugu ya Espagne igomba guhurira ku mukino wa nyuma n’iza kurokoka hagati y’Ubufaransa na Argentine.