El clasico: Real Madrid yisubije icyubahiro imbere ya FC Baricelona

Mu ijoro ryo kuri iki Cyumweru tariki ya 1 Werurwe 2020, abafana b’ikipe ya Real Madrid itozwa n’umutoza Zinedine Zidane, bararanye akanyamuneza nyuma yo gukora ibyaherukaga kuba mu mwaka wa 2017 imbere y’ikipe ya FC Barcelona.

Muri uyu mukino wahuje aya makipe yombi wagaragayemo ishyaka ryinshi ku mpande zombi, Ikipe ya Real Madrid niyo yari yakiriye mukeba wayo FC Barelona  wari uyoboye shampiyona ya La Liga iyifatira ku gahanga iyizimanira ibitego 2-0.

Mu mukino wa El clasico warebwe n’abarenga miliyoni 500 hirya no hino ku isi,ikipe ya Real Madrid yatsinze FC Barcelona ibitego 2-0 byose byinjiye mu gice cya kabiri cy’umukino.

Nyuma yo kwitwara nabi mu mukino ubanza wa 1/16 cya UEFA Champions League igatsindirwa mu rugo na Manchester City yo mu Bwongeleza ibitego 2-0,Real Madrid yaje yariye karungu ikina umukino mwiza cyane kurusha iyindi yakinnye muri uyu mwaka w’imikino biyifasha gutsina Barcelona.

Igice cya mbere cy’umukino cyaranzwe no kwigana ku makipe yombi ariko FC Barcelona yari hejuru ya Madrid ku guhererekanya umupira ndetse no kurema uburyo bw’ibitego.Abarimo Antoine Griezmann, Arthur na Lionel Messi bahushije uburyo bwabazwe muri iki gice cyarangiye ari 0-0.

Mu gice cya kabiri,Real Madrid yaje yariye karungu by’umwihariko hagati mu kibuga aho abasore barimo Casemiro,Kroos na Isco bari hejuru cyane ndetse babuza gukina Messi utari mu bihe byiza.

Nyuma y’umwanya munini Real Madrid icaracara imbere y’izamu rya FC Barcelona, Isco na Benzema bari guhusha ibitego byabazwe,yafunguye amazamu ku munota wa 71 ku gitego cyatsinzwe na Vinicius Jr ku mupira mwiza yahawe na Kroos,yinjira mu rubuga rw’amahina ateye umupira Pique awuyobya ugana mu izamu.

Vinicius Jr w’imyaka 19 n’iminsi mike, yari yapfushije ubusa imipira myinshi cyane ariko kuri iyi nshuro yikosoye afasha Real Madrid kuyobora umukino ndetse anaca agahigo ko kuba umukinnyi ukiri muto utsinze igitego muri El Clasico kari kamaze imyaka myinshi gafitwe na Messi.

Ku munota wa 74 Messi yaciye mu rihumye ba myugariro ba Real Madrid yinjira mu rubuga rw’amahina agiye gutsinda igitego Marcelo wari wamukurikiye amukuraho umupira mu buryo butangaje.

FC Barcelona yabonye uburyo bwiza bwo kwishyura igitego kuri coup franc Messi yateye imbere y’izamu rya mukeba,Pique ateye umutwe ujya hanze.

Mu rwego rwo gutinza iminota 3 umusifuzi yari yongeyeho,Zidane yinjije mu kibuga Mariano Diaz asimbura Karim Benzema.

Mariano Diaz yatunguranye ku mupira wa mbere yakozeho, acenga Samuel Umtiti arirukanka aramusiga asigarana n’umunyezamu Terstegen bonyine ahita amuroba biba bibaye ibitego 2-0 bya Real Madrid.

Gutsinda uyu mukino byatumye Real Madrid iyobora La Liga n’amanota 56 kuri 55 ya Barcelona ya kabiri ku rutonde rw’agateganyo.

Real Madrid yaherukaga gutsinda FC Barcelona mu mwaka wa 2017,yisubije icyubahiro ku kibuga cyayo Santiago Bernabeu.

Comments

comments