Cristiano Ronaldo ashobora gutandukana na Juventus atarangije amasezerano ye

Itangazamakuru ryo mu Butariyani ryatangaje ko Cristiano Ronaldo ashobora gutandukana na Juventus habura imyaka ibiri ngo amasezerano afitanye na yo arangire, nyuma yo kunanirwa kuyifasha kwitwara neza mu mikino ya UEFA Champions league.

Amakuru avuga ko umubano wa Cristiano n’iyi kipe ye watangiye kuba mubi, nyuma y’aho Juventus isezererewe na Ajax muri ¼ k’irangiza muri UEFA Champions league.

Magingo aya Juventus iri mu nzira zo kwegukana igikombe cya shampiyona ku ncuro ya munani yikurikiranya, gusa iki gikombe nta cyo kivuze cyane kuri iyi kipe kuko yananiwe kugera ku ntego yo gutwara Champions league yari yihaye uyu mwaka. Ni nyuma yo guseberezwa na Ajax imbere y’abafana bayo iyitsinda ibitego 2-1.

Nk’uko ikinyamakuru La Repubblica cyabyanditse, ngo gutsindwa na Ajax byateje umwuka mubi muri Juventus, binashyira ahazaza ha Ronaldo muri iyi kipe mu rungabangabo ku buryo ashobora kuyisohokamo mu mwaka utaha.

Bivugwa ko Ronaldo yahungabanyijwe cyane no gutsindwa na Ajax y’abana bakiri bato batanafite aho bahuriye na Juventus ku bijyanye n’agaciro k’amafaranga.

Ikinyamakuru Gazetta dello Sport cyo cyavuze ko muri Juventus hacitse igikuba nyuma yo gutsindwa na Ajax.

Cristiano Ronaldo yaguzwe na Juventus angana na miliyoni 89 z’ama-Pound igira ngo ayifashe kwegukana UEFA Champions league. Ni nyuma yo kubikora ari muri Manchester United na Real Madrid aho yatwariye ibikombe bitanu.

Ni igikombe iyi kipe yifuza nyuma y’imyaka 23 itazi uko kimera. Hafi iheruka kugitwara ni mu mwaka wa 1995/96, gusa muri 2015 na 2017 yagiye igera ku mukino wa nyuma ariko ntiyoroherwe n’amakipe ya FC Barcelona na Real Madrid.

Ronaldo wageze muri Juventus mu mpeshyi y’umwaka ushize, amaze kuyitsindira ibitego 26 mu mikino yose yayikiniye.

Comments

comments