Cristiano Ronaldo arabura igitego kimwe agatanga Messi guca agahigo gakomeye

Umunya-Potugal Cristiano Ronaldo ukinira ikipe ya Juventus, arabura igitego kimwe akuzuza ibitego 700 amaze gutsinda kuva yatangira gukina umupira w’amaguru.

Uyu mugabo usanzwe ari Kapiteni w’ikipe y’igihugu ya Portugal, yaraye atsinze igitego cya 699 ikipe y’igihugu cye itsinda Luxemburg ibitego 3-0, mu mukino wo gushaka itike y’igikombe cy’Uburayi kizaba mu mwaka utaha wa 2020.

Iki gitego yatsinze ku munota wa 65 w’umukino nyuma yo gusiga ba myugariro akaroba umuzamu, kinjiye mu mukino wa 972 yakinaga mu marushanwa atandukanye.’

Mu gihe Cristiano yaba atsinze igitego mu mukino Portugal izahuriramo na Ukraine, azahota yuzuza ibitego 700 azaba atsinze muri kariyeri ye. Ni umukino ushobora kuzahesha Portugal itike yo gukina imikino y’igikombe cy’Uburayi yatwaye muri 2016, mu gihe yaba ishoboye kuwutsinda.

Mukeba we Lionel Messi umaze gukina imikino 828 mu marushanwa atandukanye, arabura ibitego 28 kugira ngo yuzuze ibitego 700 dore ko uyu munya-Argentine amaze gutsinda ibitego 672 mu marushanwa atandukanye.

Ibindi bitego bya Portugal byatsinzwe na Bernardo Silva ukinira Manchester City yo mu Bwongereza, cyo kimwe na Goncalo Guedes watsinze igitego cy’agashinguracumu mu minota ya nyuma y’umukino.

Portugal iracyari iya kabiri mu tsinda B n’amanota 11, mu gihe Ukraine bagomba guhura ari yo iyoboye iri tsinda.

Comments

comments