Coronavirus: Perezida Donald Trump yahagaritse ingendo hagati ya USA n’Uburayi
Nyuma y’ikwirakwira ry’icyorezo cya coronavirus gikomeje guteza Isi inkeke, perezida wa Leta zuzne ubumwe za Amerika Donald Trump yatangaje amabwiriza mashya ku ngendo hagati ya Amerika n’uburayi mu rwego rwo kurwanya icypo cyorezo.
Mu ijambo ryaciye kuri televiziyo, yavuze ko ingendo ziva mu bihugu 26 by’Uburayi zigomba guhagarikwa mu gihe cy’iminsi 30.
Yavuze ko “izi ngamba zikomeye ariko za ngombwa” zitareba Ubwongereza, igihugu ubu kimaze kugira abantu 460 banduye iki cyorezo.
Muri Leta zunze ubumwe za Amerika abantu 1,135 bamaze kuyandura naho 38 imaze kubahitana.
Trump yicaye mu biro bye kuri uyu wa gatatu nijoro, yagize ati: “Mu gukumira ko hari abandi bayirwaye binjira i wacu, turaba duhagaritse ingendo zose ziva mu Burayi.
“Aya mategeko mashya aratangira gukurikizwa kuva kuwa gatanu saa sita z’ijoro”.
Gusa iri tegeko ntabwo rireba abaturage ba Amerika.
Icyemezo cyatangajwe na Perezida Trump gishobora kugira ingaruka zikomeye ku bukungu bw’ibihugu n’iterambere bwite ry’abaturage ba Afurika bakoreraga ingendo muri Amerika baciye Iburayi.
Trump yavuze ko Uburayi bwananiwe gufata “ingamba nk’izo Amerika yafashe” mu kwirinda iyi virusi.
Trump yavuze ibi hashize amasaha macye Ubutaliyani – igihugu kizahajwe n’iyi virus kurusha ibintu nyuma y’Ubushinwa – gitangaje ko ubucuruzi bwose bugomba gufunga uretse abacuruza ibiribwa n’imiti.
Bwana Trump yavuze ko iri tegeko rinareba ubucuruzi n’ubwikorezi bw’ibintu buva mu Burayi buza muri Amerika.
Gusa nyuma yanditse kuri Twitter ko “Ubucuruzi nta buryo buzabangamirwa n’iri tegeko”.
