China: Indege yaririmo abantu 132 yakoze impanuka irashya irakongoka

Indege ya Boeing 737-800 ya kompanyi yitwa China Eastern Airlines yakoze impanuka igwa mu mpinga y’umusozi i Tengxian, muri Guangxi, irimo abagenzi 132, nk’uko byatangajwe na CCTV.

Yahanukiye hafi y’umujyi wa Wuzhou mu ntara ya Guangxi ihana imbibi na Guangzhou, umujyi munini mu majyepfo ashyira iburasirazuba.

Ubuyobozi bw’ikigo gishinzwe indege za gisivili mu Bushinwa (CAA) bwatangaje ko muri iyo ndege harimo abagenzi 123 n’abakozi bayo icyenda.

Nk’uko ibitangazamakuru byo mu Bushinwa bibitangaza, iyi mpanuka y’iyi ndege ya Boeing 737 yateje umuriro mwinshi kuri uwo musozi.Umubare w’abapfuye nturamenyekana kugeza ubu, kimwe n’icyateye iyi mpanuka.

Urugendo MU5735 rw’iyi ndege yavuye i Kunming saa 13:11 ku isaha yaho (05:11 GMTna saa moya na 15 zo mu Rwanda) kandi byari biteganijwe ko igera i Guangzhou saa 15:05.

Abakozi bashinzwe ubutabazi boherejwe muri kariya gace. CAA nayo yavuze ko nabo bohereje abakozi aho byabereye.

Ibikoresho bikurikirana indege byagaragaje ko iyi ndege yari imaze isaha imwe gusa mu kirere, kandi yari yegereje kugera aho yerekezaga.

Amakuru ya nyuma y’urubuga FlightRadar24 yerekana urugendo rw’iyi ndege rwarangiye saa 14:22 ku isaha yaho, iri ku butumburuke bwa 982m.

Muri 2018, Indege ya Lion Air 610 yo mu bwoko bwa Boeing 737 Max yakoze impanuka, naho indi ya 737 Max ya Kompanyi Ethiopian Airlines yakoze impanuka muri 2019 . Indege zose zitwara abagenzi Boeing 737 MAX zahagaritswe kwisi yose nyuma y’izi mpanuka zombi

Comments

comments