Champions league: FC Barcelona yatsindiye Juventus iwayo, Manchester United yihaniza RB Leipzig

Ikipe ya FC Barcelona yaraye igiye gutsindira Juventus mu Butaliyani ibitego 2-0, mu mikino ya UEFA Champions league yari yakomeje ku munsi wa kabiri w’imikino y’amatsinda.

Juventus yari yakiriye FC Barcelona ku kibuga Allianz Stadium, gusa idafite abakinnyi bayo b’inkingi za mwamba nka Cristiano Ronaldo wanduye Covid-19, cyo kimwe n’abarimo Kapiteni Chiellini na Mathjis de Ligt bavunitse.

FC Barcelona yo yaburaga Gerard Pique wari wareretswe ikarita itukura mu mukino uheruka.

Muri rusange ikipe ya Juventus yagaragaje urwego rwo hasi, gusa Arvalo Morata yayitsindiye ibitego bitatu byose byanzwe kubera ko yabaga yaraririye.

FC Barcelona yari yahushije ibitego byinshi, yashoboraga gufungura amazamu ku munota wa kabiri, ishoti rya mbere rikomeye ryatewe na Miralem Pjanić rikurwamo na Wojciech Szczesny mu gihe undi mupira watewe na Antoine Griezmann, wasubijwe inyuma n’igiti cy’izamu.

Ousmane Dembélé yafunguye amazamu ku munota wa 14, ku mupira yatereye inyuma gato y’urubuga rw’amahina, ukora ku kirenge cya Federico Chiesa mbere yo kuruhukira mu izamu ryari ririnzwe na Wojciech Szczesny.

Iki gitego cya Dembele ni cyo cyajyanye amakipe yombi mu kiruhuko.

Juventus de Turin yasigaye mu kibuga ari abakinnyi 10 ubwo Merih Demiral yahabwaga ikarita ya kabiri y’umuhondo ku ikosa yakoreye kuri Miralem Pjanic wakinaga n’ikipe yahozemo.

Ansu Fati wari wasimbuye Dembélé, yakoreweho ikosa mu rubuga rw’amahina ku munota wa 90, FC Barcelona ibona igitego cya kabiri cyatsinzwe na Lionel Messi kuri penaliti.

Gutsinda uyu mukino byahesheje FC Barcelone kuyobora itsinda n’amanota atandatu n’ibitego bitandatu izigamye, irusha atatu Juventus.

Uko indi mikino y’amatsinda yagenze

Itsinda E

FC Krasnodar 0-4 Chelsea

Sevilla 1-0 Rennes

Itsinda F

Borussia Dortmund 2-0 Zenit St. Petersburg

Club Brugge 1-1 Lazio

Itsinda G

Ferencvaros 2-2 Dynamo Kyiv

Juventus 0-2 FC Barcelone

Itsinda H

Istanbul Basaksehir 0-2 Paris Saint-Germain

Manchester United 5-0 RasenBallsport Leipzig

Comments

comments