AmakuruImikino

CAFCC: Raja Casablanca yatsinzwe na AS Vita Club ntibyayibuza gutwara igikombe

Raja Casablanca yo muri Marocco yatwaye igikombe cya CAF Confederation Cup ku bitego 4-3.

Ni igikombe yaherewe mu mukino wo kwishyura wabaye kuri iki cyumweru tariki ya 02 Ukuboza i Kinshasa muri Repubulika iharanira Demokarasi ya Congo.

Mu mukino ubanza Raja Casablanca yari yatsinze As Vita Club y’umutoza Florent Ikwange Ibengé 3-0 mu mukino wabereye muri Marocco.

Muri uyu mukino wo kwishyura , imbere y’abafana benshi , Raja Casablanca ni yo yabanje gufungura amazamu ku gitego cyatsinzwe na Abdelilah Hafidi .

As Vita Club ntiyacitse intege n’ubwo yari imaze gutsindwa ibitego 4-0 mu mikino yose, yakomeje kwataka Raja Casablanca birayihira ibona ibitego 3 byatsinzwe na Makusu Mundele mu gice cya mbere, Mukoko Batezadio na Fabrice Ngoma mu gice cya kabiri.

Umukino warangiye ari ibitego 3 bya As Vita Club kuri 1 cya raja Casablanca.

Bitewe n’uko mu mukino ubanza Raja Casablanca yari yatsinze Vita Club 3-0 byatumye imikino yombi irangira Raja casablanca iri imbere ku kinyuranyo cy’ibitego 4-3.

N’ubwo As Vita Club yarangije iri imbere ariko Raja Casablanca yahise itwara igikombe cya Caf Confederation Cup cya 2018.

Juan Carlos Garrido, umutoza wa Raja Casablanca yahise aba umutoza wa mbere muri Afurika ubashije gutwara ibikombe bibiri bya CAF Confederation Cup mu makipe abiri atandukanye nyuma y’icyo yari yaratwaranye na  Al Ahly mu 2014 atsinze Sewe San Pedro yo muri Cote d’Ivoire.

Twabibutsa ko iyi As Vita Club ariyo Sugira Erneste yakiniraga bagatandukana agahita yerekeza muri APR FC atarakinira umukino n’umwe kubera ibibazo by’imvune.

Twitter
WhatsApp
FbMessenger