Bidasubirwaho Antoine Griezmann ni umukinnyi wa FC Barcelona
Ikipe ya FC Barcelona yemeje ko yasinyishije Umufaransa Antoine Griezmann wakiniraga Atletico Madrid, nyuma yo kumutangaho akayabo ka miliyoni 120 z’ama-Euro.
Iyi kipe y’i Catalunya yemeje aya makuru ibicishije ku mbuga nkoranyambaga zayo.
Antoine Griezmann w’imyaka 28 y’amavuko, yasinyanye na FC Barcelona amasezerano y’imyaka itanu, anemeranya na yo ikipe yose izamwifuza aya masezerano atarangiye izishyura miliyoni 800 z’ama-Euro kugira ngo imwegukane.
Griezmann yerekeje muri FC Barcelona, nyuma y’igihe havugwa amakuru ko ashobora kwerekeza muri iyi kipe. Aya makuru yari yatangiye gututumba mu mpeshyi y’umwaka ushize, gusa aza gucogora nyuma y’uko uyu musore yari amaze gufata icyemezo cyo kuguma muri Atletico Madrid.
Idosiye ya Griezmann muri FC Barcelona yongeye kuburwa mu mpera za Mata uyu mwaka, aza kubishimangira ku giti cye ku wa 15 Gicurasi ubwo yatangazaga ku mugaragaro ko atazongera gukinira Atletico Madrid.
Antoine Griezmann wari umaze imyaka itanu akinira Atletico Madrid yagezemo mu mwaka w’imikino wa 2014 avuye muri Real Sociedad, yari amaze kuyitsindira ibitego 133 mu mikino 257 yayikiniye mu marushanwa atandukanye.
Asanze muri FC Barcelona abakinnyi b’ibihangage nka Lionel Messi na Luis Suarez, bashobora kwiyongerwaho na Neymar Jr. amakuru menshi akomeje kwerekeza i Catalunya.
