Bakina bipima: Rayon Sports yaguye miswi na AS Kigali mbere yo gukina imikino Nyafurika
Ikipe ya Rayon Sports na AS Kigali zaguye miswi, mu mukino wa gicuti aya makipe yombi yari yahuriyemo kuri Stade Amahoro kuri uyu wa kane.
Ni umukino amakipe yombi yakinnye mu rwego rwo kwitegura imikino yo kwishyura mu mikino Nyafurika. Rayon Sports ikomeje kwitegura ikipe ya Al Hilal Omdurman yo muri Sudani banganyije igitego 1-1 mu mukino ubanza w’ijonjora ry’ibanze rya CAF Champions league wabereye i Kigali, mu gihe AS Kigali ikomeje kwitegura KMC yo muri Tanzania banganyije 0-0 mu mukino ubanza wa CAF Confederations Cup wabereye i Kigali.
Umukino wo kwipima wahuje aya makipe warangiye aguye miswi igitego 1-1.
AS Kigali yatsindiwe na Sentongo Farouk Saif, mu gihe Rayon Sports yatsindiwe na Bizimana Yannick.
Abakinnyi barimo Iranzi Jean Claude na Cyitegetse Bogard wa AS Kigali ntabwo barangije uyu mukino kubera ko baje kwerekwa amakarita atukura.
Rayon Sports igomba kujya kwishyura Al Hilal ku wa 24 Kanama, mbere y’umunsi umwe AS Kigali yagiye kwishyura KMC i Dar Es Salaam muri Tanzania.
