APR FC VS Rayon Sports: Ibivugwa mbere y’umukino
Umukino urarangira ari inde utsinze hagati ya APR FC na Rayon Sports?
Iki kibazo kiribazwa ku mukino w’umunsi wa munani wa shampiyona y’u Rwanda , Azam Rwanda Premier League, utegerejwe n’imbaga y’abanyarwanda kuri uyu wa gatatu tariki ya 12 Ukuboza.
Ni umukino urabera kuri Stade Amahoro i Remera saa kumi n’ebyiri z’umugoroba. Uyu mukino urahuza abakeba b’ibihe byose mu mupira w’amaguru hano mu Rwanda. Ni APR FC iraba yakira Rayon Sports.
Rayon Sports irakina uyu mukino ibura abakinnyi bayo bakomeye nka Kevin Muhire ukiri mu igeragezwa mu kipe ya Misr Lel Makasa yo mu Misiri, Bimenyimana Caleb wafatiwe na FERWAFA ibihano, Kakule Mugheni Fabrice wavunikiye mu mukino wa Rayon Sports na AS Kigali, Congolais wavuye muri APR FC wavunikiye mu myitozo, by’umwihariko hakiyongeraho rutahizamu bari bahanze amaso waturutse muri Brazil.
Uyu munya-Brazil Brazil Jonathan Rafael da Silva, FERWAFA ntiramuha ibyangombwa bimwemerera gukina shampiyona akaba ari yo mpamvu iratuma adakina uyu mukino. Biteganyijwe ko azabona icyemezo cya FERWAFA kuri uyu wa Kane ubwo akazakina indi mikino ikurikira. Ibi biri gufatwa nk’urwitwazo ku bafana ba Rayon Sports.
Kuri uyu mukino kandi Rayon Sports iraba yagaruye Umunya-Ghana Donkor Prosper wari umaze iminsi adakina kubera imvune.
APR FC iza kuba yakiriye mukeba wayo irakina uyu mukino ibura amazina atatu ; Andrew Butera ufite imvune, Emmanuel Imanishimwe uri mu kwa buki cyo kimwe na Sugira Ernest utarakira imvune.
Kuva mu 1995 mu mikino yose, Rayon Sports na APR FC zimaze guhura inshuro 85. Rayon Sports yatsinzemo imikino 28, APR FC itsindamo imikino 36, zinganya imikino 23. Muri iyi mikino habonetsemo ibitego 243, harimo 118 ku ruhande rwa Rayon Sports na 125 ku ruhande rwa APR FC.
Umukino uheruka guhuza amakipe yombi muri shampiyona wabaye tariki 15 Kamena 2018. APR FC icyo gihe yatsinze Rayon Sports 2-1 naho muri rusange umukino uheruka guhuza impande zombi wabaye tariki 30 Nzeri 2018 Rayon Sports yatsinze APR FC 1-0 mu mukino wa nyuma w’igikombe cy’Agaciro.
Inshuro ebyiri uyu mukino uhuza ibigugu mu Rwanda warumbutsemo ibitego byinshi ni ubwo Rayon Sports yatahanaga intsinzi kuko niyo yabashije kunyagira APR FC ibitego 5-2 (mu 1996 na 1997).
Nugutegereza tukareba utahana amanota atatu kuri uyu munsi wa 8 wa shampiyona.
Usure teradignews.rw cyangwa page yacu ya Facebook kenshi umenye uko umukino uragenda.
