APR FC itsinze Mukura VS itwara igikombe cya Super Cup 2018
Ikipe y’ingabo z’igihugu, APR FC, itsinze Mukura VS ibitego 2-0 itwara igikombe gikinwa n’ikipe yatwaye igikombe cya shampiyona n’iyatwaye igikombe cy’amahoro, Super Cup.
Ni umukino wabaye kuri uyu wa Gatandatu tariki ya 06 Ukwakira 2018 i Rubavu saa cyenda n’igice z’amanywa kuri stade Umuganda. APR FC ni yo yatangiye yotsa igitutu Mukura VS maze ku munota wa 46 Hakizimana Muhadjiri atsinda igitego cya mbere mu gihe ku munota wa 53 Bigirimana Issa ari we watsinze igitego cya kabiri.
Abafana bibumbiye mu itsinda rya Zone 1, Intare za APR FC , Online Fan Club, Umurava na Kicukiro Fan Club nibo bahagurukiye rimwe mu Mujyi wa Kigali berekeje i Rubavu gutera ingabo mu bitugu ikipe yabo, mu gihe ku rundi ruhande abafana ba Mukura nabo bari bafite imodoka yuzuye yari yaturutse i Huye.
APR FC itwaye iki gikombe nyuma yo gutwara igikombe cya shampiyona ya 2017/2018 ifite amanota 66, irusha amanota atanu AS Kigali yarangije ku mwanya wa 2, yatsinze imikino 19 inganya 9 itsindwa 2, ndetse yatsinze ibitego 51 mu mikino 30 yakinwe muri shampiyona.
APR FC itwaye Super Cup 2018 nyuma y’uko iya 2017 yari yatsindiwe na Rayon Sports ku mukino wa nyuma, APR FC ni yo igomba guhagararira u Rwanda mu mikino ya CAF Shampions League mu gihe Mukura VS ari yo izakina imikino ya CAF Confederation Cup.
