APR FC ishobora gutombora ikigugu muri CAF Confederation Cup

Ikipe ya APR FC nyuma yo gusezererwa muri CAF Champions league, yamaze kumenya amakipe 16 agomba kuvamo imwe bazahurira mu mukino wa kamarampaka, yayisezerera ikagera mu matsinda ya CAF Confederation Cup.

Ku wa Gatandatu w’icyumweru gishize ni bwo APR FC yanyagiwe ibitego 4-0 na Etoile Sportive du Sahel yo muri Tunisia, iyisezerera ku giteranyo cy’ibitego 5-1.

APR FC cyo kimwe n’andi makipe yasezerewe mu ijonjora rya kabiri rya CAF Champions league, yahise akomereza urugendo muri Confederation Cup aho agomba guhurira muri kamarampaka n’amakipe yageze mu ijonjora rya nyuma rya ririya rushanwa, mbere yo kumenya abagomba kugera mu matsinda.

Urugendo rurasa n’urukigoranye kuri APR FC kuko amakipe yose yageze mu ijonjora rya gatatu rya Confederation Cup ari ay’amazina aremereye.

Muri aya makipe harimo Gor Mahia yo muri Kenya yasezereye APR muri CAF Champions league y’umwaka ushize na Enyimba FC yasezereye Rayon Sports muri 1/4 cy’irangiza cya Confederation Cup ya 2018.

Muri rusange amakipe 16 azavamo imwe izahura na APR FC arimo: Marumo Gallants yo muri Afurika y’Epfo, Orlando Pirates yo muri Afurika y’Epfo, Al Masry yo mu Misiri, Pyramids FC yo mu Misiri, JS Kabylie yo muri Algeria, JS Soura yo muri Algeria, G.D Interclube yo muri Angola na Coton Sport Garua yo muri Caméroun.

Andi makipe ni Binga FC yo muri Mali, Al Ahly Tripoli yo muri Libya, CS Sfaxien yo muri Tunisia, Gor Mahia yo muri Kenya, DCMP yo muri Congo Kinshasa, Enyimba FC yo muri Nigeria, Red Arrows yo muri Zambia na RS Berkane yo muri Maroc.

Tombora y’uko amakipe azahurira mu mikino ya kamarampaka ya Confederation Cup iteganyijwe ku wa 26 Ukwakira.