Amahirwe menshi arasubiza Mourinho muri Real Madrid
Jose Mourinho ashobora kongera gutoza Real Madrid agasimbura Santiago Solari waranzwe n’umusaruro mubi kuva yajya gusimbura Zidane.
Telegraph yanditse ko ifite amakuru yizewe ko ku kigero cy’i 100% Real Madrid yiteguye kugarura Mourinho wayivuyemo mu 2013 yatoje imyaka 3 mbere y’uko yerekeza muri Chelsea.
Uyu munya-Portugal ukunze kuva mu makipe yose yaciyemo yirukanwe ndetse asize umwuka mubi mu bakinnyi, magingo aya ni nta kazi afite kuko yirukanwe na Manchester United mu Ukuboza azira umusaruro mubi no kutumvikana n’abakinnyi be barangajwe imbere na Paul Pogba yakuye muri Juventus amutanzeho akayabo ka miliyoni 100 z’amadorali.
Andi makuru avuga ko Mourinho yabwiye beIN Sports ko gusubira muri Real Madrid nta kibazo kirimo.
Umutoza wa Real Madrid Santiago Solari, afite amasezerano amugeza mu 2021, gusa ariko isaha n’isaha ashobora kwirukanwa nyuma y’uko ikipe ye isezerewe muri Champions League na Ajax ndetse no muri shampiyona ikaba ihagaze nabi.
Mu gihe Mourinho we yatangaje ko Real Madrid itigeze ibimubwira ho, hari amakuru yemeza ko abayobozi b’iyi kipe y’ i Santiago Bernabéu bakibiganiraho ngo barebe ko bahamagara Mourinho.
Real irarushwa amanota 12 na Barcelona muri shampiyona yanayisezereye muri Copa del Rey, ibi bivuze ko uyu mwaka w’imikino nta gikombe na kimwe iyi kipe izabona.
Igitutu kiri kuri Perezida wa Reaol Madrid Florentino Perez wirukanye Mourinho akaba ashaka no kumugarura, aranashinjwa kugurisha Cristiano wari ubafatiye runini ndetse no gusinyisha abatoza badashoboye bigakubitiraho gutandukana na Zidane wari umaze kuba umukunzi w’abafana ba Real Madrid .
N’ubwo ari Mourinho bahaye amahirwe menshi yo gusibira muri Real , hari andi mazina akomeye ari kuvugwa nka Mauricio Pochettino utoza Tottenham na Massimiliano Allegri ushobora gutandukana na Juventus ariko we bivugwa ko yifuza gutoza mu bwongereza.
Mu gihe hari abavuga ko Zidane ashobora gusubira muri Real Madrid, Ramon Calderon wahoze ari perezida wayo yavuze ko Zidane yanze gusubirayo.
