Amafoto yaranze umukino FC Barcelona yanyagiyemo Huesca ibitego 8-2
Ikipe ya FC Barcelona yaraye ifashe umwanya wa mbere muri shampiyona y’ikiciro cya mbere ya Espagne, nyuma yo gutsinda Huesca ibitego 8-2 mu mukino w’umunsi wa gatatu wa shampiyona wabereye i Camp Nou ku kibuga cya Barcelona.
Huesca ni yo yafunguye amazamu mbere, ku gitego cyatsinzwe na Cucho Hernández ku munota wa kabiri w’umukino.
Barcelona yari yatangiye ihuzagurika yahise itangira gushaka ibyanzu yacamo kugira ngo yishyure iki gitego. Lionel Messi yaje kwishyura iki gitego ku munota wa 15 w’umukino, myugariro witwa Pulido yitsinda icya kabiri ku wa 28 mbere y’uko ku munota wa 39 Suarez atsinda igitego cya gatatu.
Huesca yabonye igitego cya kabiri cyatsinzwe na Alex Gallar ku munota wa 42 w’umukino. Amakipe yombi yagiye kuruhuka Barca iri imbere n’ibitego 3-2.
Igice cya kabiri cy’umukino cyaranzwe go kwataka cyane ku ruhande rwa Barcelona.
Nyuma y’iminota 2 iki gice gitangiye, Barcelona yahise itsinda igitego cya kane ibifashijwemo na Ousmane Dembele. Ku munota wa 52 Ivan Raktic yatsindiye Barcelona igitego cya gatanu, ku wa 61 Messi atsinda icya gatandatu, icya karindwi kinjira ku wa 82 gitsinzwe na Jordi Alba mbere y’uko Suarez atsinda icya munani kuri penaliti.
Muri uyu mukino Messi yaciyemo agahingo ko kuba umukinnyi wa mbere muri La Liga ushoboye gutanga imipira yavuyemo ibitego 150, mu gihe insinzi y’ibitego 8-2 ari yo nsinzi ikomeye umutoza Ernesto Valvelde yabonye bwa mbere mu mateka ye.
